Smári Jökull Jónsson

Smári Jökull heiti ég og er fæddur 1983 í Vestmannaeyjum. Þar ólst ég upp og gekk í Barnaskóla Vestmannaeyja. Í Barnaskólanum var ég með marga frábæra kennara og kynntist mörgum skemmtilegum krökkum sem margir hverjir eru góðir vinir mínir í dag.

Eins og flestir í Eyjum þá stundaði ég íþróttir af kappi. Týr var mitt félag áður en Týr og Þór sameinuðust í ÍBV. Ég var bæði í fótbolta og handbolta fram til 11-12 ára aldurs en þá fékk handboltinn að víkja og fótboltann stundaði ég þar til ég var tæplega tvítugur.

Eftir að grunnskólanum lauk fór ég í Framhaldsskólann í Vestmannaeyjum sem að mínu mati er vanmetnasti framhaldsskóli landsins. Frábær skóli sem undirbjó mig vel fyrir mitt háskólanám. Aðalkostur skólans er hversu persónulegur hann er og andrúmsloftið þar er mjög afslappað og skemmtilegt. Þaðan útskrifaðist ég fyrir jólin 2002 og hélt í háskólanám.

Maður var byrjaður frekar snemma að vinna og strax þegar ég var 10-11 ára þá var ég byrjaður að bera út DV heima í Eyjum. Svo var það bæjarvinnan sem tók við á sumrin og loks sláttugengið en þar var ég í 3 ár í frábærum félagsskap undir leiðsögn Sigga Valló. Þegar ég var 16 ára var ég byrjaður að vinna við knattspyrnuþjálfun og geri enn. Alltaf hef ég verið með yngri flokka, bæði stelpur og stráka. Fyrst var ég auðvitað hjá ÍBV en svo þegar ég fór í bæinn í nám hóf ég störf hjá Breiðabliki, en fór reyndar alltaf heim til Eyja á sumrin. Síðastliðið sumar var svo reyndar fyrsta sumarið sem ég var í höfuðborginni yfir sumar og þá var ég að þjálfa á fullu hjá Blikunum.

Ég hef mikið verið í félagsstörfum. Var framboði til bæjarstjórnar Vestmannaeyja árið 2002 fyrir Vestmannaeyjalistann og var varamaður í nefndum á þeirra vegum á kjörtímabilinu sem fylgdi. Auk þess var ég í aðalstjórn ÍBV-íþróttafélags í 3 ár og í stjórn Ungra Jafnaðarmanna í Vestmannaeyjum. Nú er ég varamaður í stjórn KMSK (Kennarafélag Mosfellsbæjar, Seltjarnarness og Kópavogs) og í kennararáði Smáraskóla.

Þegar ég flutti frá Eyjum til að fara á háskólanám þá varð Kennaraháskólinn fyrir valinu og hóf ég nám þar haustið 2003. Þar var ég í 3 ár og átti frábæran tíma þar. Skólinn er virkilega skemmtilegur, námið strembið en skemmtilegt og fólkið þar frábært. Ég kynntist mörgum af mínum bestu vinum á þessum árum og meira að segja kynntist ég minni kærustu í Kennó.

Þegar verunni þar lauk hóf ég störf í Smáraskóla og þar er ég nú á mínu þriðja starfsári. Ég bý nú í Hafnarfirði ásamt kærustunni og auk þess að kenna er ég að þjálfa knattspyrnu hjá Blikunum, reyndar er ég að hætta því. Auk þess skrifa ég um íþróttir fyrir Fréttablaðið.

Ég get ekki lokið þessu án þess að minnast á soninn sem fæddist þann 3.ágúst 2008. Hann er algjör prins og bræðir alla sem hann hittir, þvílíkur sjarmör.