Hið furðulegasta mál

Nú reyna þeir sjálfsagt að klóra yfir skítinn sem þeir hafa skilið eftir sig tengdan þessu máli.  Ég er ansi hræddur um að þetta mál hafi haft mjög skaðleg áhrif á borgarstjórnarflokk Sjálfstæðisflokksins - ekki það að ég gráti það reyndar. Ég er að horfa á Gísla Martein í viðtali á Stöð 2 núna og þar sagði hann þessa gullnu setningu "að borgarstjóri hafi misskilið meiningu borgarstjórnarmeirihlutans". Kurteisislega orðað hjá honum að borgarstjóri hafi hreinlega einsamall tekið ákvörðun sem borgarstjórnarflokkurinn var ósáttur við.

Nú á auðvitað eftir að klára málin tengdan þessum ólöglega fundi - eða réttara sagt ólöglega boðaða fundi. Það væri nú ekki beint meirihlutanum til hróss ef kæmi í ljós að sá fundur væri ólöglegur. Ansi broslegt að þeir fengu hæstaréttarlögmann sérstaklega til að stjórna fundinum, eins og það væri til þess að gera hann "löglegri".

Svo er spurning hvernig Björn Ingi og Framsóknarflokkurinn kemur út úr þessu. Það er alveg ljóst að það eru ekki allir sáttir þar og ég var nú síðast að hlusta á Önnu Kristinsdóttur fyrrverandi borgarfulltrúa Framsóknarflokksins og hún var sko alls ekki sátt og sagði að hún væri síður en svo ein um það innan flokksins.

Sigurvegari í þessu máli, ef hægt er að orða það þannig, er án efa Svandís Svavarsdóttir. Hún hefur talað máli hins almenna Reykvíkings og gert það vel. Það er einhvern veginn ekki annað hægt en að taka mark á þessari konu og nú þegar hún er að tala um Bjarna Ármannsson og hans þátt í þessu máli þá er greinilegt að hans hluti í þessu máli verður ræddur meira af hennar hálfu. Enda skrýtið að einn maður geti labbað inn í opinbert fyrirtæki með 500 milljónir, keypt sig þar inn og hagnast svo mikið á nokkrum dögum að það jafngildir kostnaðinum við eina máltíð á dag fyrir alla skólakrakka í Reykjavík í heilt ár.

Verður forvitnilegt að sjá hvernig þetta mál allt fer á næstu dögum...

Sátt meðal sjálfstæðismanna þrátt fyrir trúnaðarbrest

Athugasemdir

[Hjálmar (IP-tala skráð) 8.10.2007 kl. 20:23]

Afhverju finnst mér eins og Björn Ingi sé aðalmaðurinn í þess! Hvernig getur það gerst að maður sem er með 6-8% fylgi í einu kjördæmi (mig minnir að ég hafi lesið það einhversstaðar) geti leikið sig svona stóran:S

En held að orðspor og ímynd Bjarna Á. hafi hlotið talsverða hnekki eftir þessa helgi! Greinilegt að hann er orðinn að "business" manni sem svífst einskis, eða hvað... En finnst samt sem áður óþarfi að ráðast á hann. Finnst aðrir einstkaklingar vera fara fyrir utan sitt valdsvið og það langt fyrir utan það....

[Smári Jökull Jónsson, 10.10.2007 kl. 20:04]

Auðvitað getur hann gert það þegar hann er maðurinn sem gerir Sjálfstæðismönnum kleift að vera í meirihluta. Björn Ingi er greinilega ósammála bæjarfulltrúm Sjálfstæðismanna í hluta þessa máls og þá auðvitað skiptir hann miklu máli.

Það getur vel verið að ímynd Bjarna hafi beðið hnekki, greinilegt er að honum er alveg sama hverjir eiga peningana sem hann hirðir á siðlausan hátt - í þetta skiptið er það almenningur. En ímynd Vilhjálms borgarstjóra hefur auðvitað beðið mesta hnekki því hann hefur gjörsamlega gert sig að fífli í þessu máli og það oftar en einu sinni.