Í besta falli vandræðalegt

Það er náttúrulega bara hneyksli að maðurinn skuli reyna að ljúga þessu. Það þarf enginn að segja manni það að hann hafi ekki séð hvaða menn voru á þessum lista. Hneyksli, í besta falli vandræðalegt hjá honum. Um leið og hann reynir að ljúga er hann að segja að hann lesi ekki gögnin sem eru lögð fyrir á fundum sem hann sækir. Hreint með ólíkindum.

Fyrir utan allt sem á undan er gengið þá er bara ljóst að manninum er ekki stætt lengur. Hann á að segja af sér á stundinni - ekki vera að dandalast með Yoko í Viðey !

Vilhjálmur segist ekki hafa séð lista yfir kaupréttarhafa

Góður

Kristján Már Unnarsson átti asskoti góð ummæli í beinni útsendingu á Stöð 2 nú rétt áðan. Þar var hann að kynna frétt um friðarsúluna góðu sem tendra á í kvöld og byrjaði fréttina á að segja "Á íslensku heitur hún Imagine peace"

Vissi ekki að það væri íslenska, og er ég þó íslenskukennari...

Hið furðulegasta mál

Nú reyna þeir sjálfsagt að klóra yfir skítinn sem þeir hafa skilið eftir sig tengdan þessu máli.  Ég er ansi hræddur um að þetta mál hafi haft mjög skaðleg áhrif á borgarstjórnarflokk Sjálfstæðisflokksins - ekki það að ég gráti það reyndar. Ég er að horfa á Gísla Martein í viðtali á Stöð 2 núna og þar sagði hann þessa gullnu setningu "að borgarstjóri hafi misskilið meiningu borgarstjórnarmeirihlutans". Kurteisislega orðað hjá honum að borgarstjóri hafi hreinlega einsamall tekið ákvörðun sem borgarstjórnarflokkurinn var ósáttur við.

Nú á auðvitað eftir að klára málin tengdan þessum ólöglega fundi - eða réttara sagt ólöglega boðaða fundi. Það væri nú ekki beint meirihlutanum til hróss ef kæmi í ljós að sá fundur væri ólöglegur. Ansi broslegt að þeir fengu hæstaréttarlögmann sérstaklega til að stjórna fundinum, eins og það væri til þess að gera hann "löglegri".

Svo er spurning hvernig Björn Ingi og Framsóknarflokkurinn kemur út úr þessu. Það er alveg ljóst að það eru ekki allir sáttir þar og ég var nú síðast að hlusta á Önnu Kristinsdóttur fyrrverandi borgarfulltrúa Framsóknarflokksins og hún var sko alls ekki sátt og sagði að hún væri síður en svo ein um það innan flokksins.

Sigurvegari í þessu máli, ef hægt er að orða það þannig, er án efa Svandís Svavarsdóttir. Hún hefur talað máli hins almenna Reykvíkings og gert það vel. Það er einhvern veginn ekki annað hægt en að taka mark á þessari konu og nú þegar hún er að tala um Bjarna Ármannsson og hans þátt í þessu máli þá er greinilegt að hans hluti í þessu máli verður ræddur meira af hennar hálfu. Enda skrýtið að einn maður geti labbað inn í opinbert fyrirtæki með 500 milljónir, keypt sig þar inn og hagnast svo mikið á nokkrum dögum að það jafngildir kostnaðinum við eina máltíð á dag fyrir alla skólakrakka í Reykjavík í heilt ár.

Verður forvitnilegt að sjá hvernig þetta mál allt fer á næstu dögum...

Sátt meðal sjálfstæðismanna þrátt fyrir trúnaðarbrest

Bítilóðir

Viðar Togga sagðist vera alveg bítilóður þegar ég hitti hann á Þjóðhátíðinni. Þá var hann ásamt félgöum sínum nýbúinn að taka á móti verðlaunum fyrir bestu búningana. "Ég er alveg bítilóður". Mér fannst þetta nokkuð vel orðað hjá kallinum.

Stuðmenn virðast einnig vera bítilóðir. Þeir eru allavega mjög æstir í að fá Ringo til að spila með sér, eðlilega. Trymbillinn mun víkja sæti og alles, eðlilega. Ég væri nú alveg til að sjá hann tromma með þeim í eins og einu lagi - hver væri ekki til í það ?

Íslenskir og ekta Bítlar?

Stjörnuspá dagsins

Vog: Þú hefur innbyggða samkomu-klukku: þú veist hvenær þú átt að koma, hvenær fara og hvað er viðeigandi þar á milli. Ó, ef fleiri væru eins og þú!

Guiding light

Þetta er nú bara eins og besta flétta í Leiðarljósi. Tveir samkynhneigðir eru í sambandi. Þeir leggja á ráðin að annar þeirra eignist barn með konu einni. Konan er ansi tæp á geði, í sjálfsvígshugleiðingum og á marga marga milljarða. Auðveld bráð !

Howard K. Stern höfðar skaðabótamál gegn rithöfundi

Ný vinna

Í kvöld byrjaði ég í nýrri vinnu. Greinilegt að mér finnst ekki nóg að vera grunnskólakennari (sem er rúmlega 100% starf) og knattspyrnuþjálfari.

Fréttablaðið fær að njóta krafta minna næstu misserin því ég er að byrja sem aukapenni á íþróttadeildinni. Mætti segja að þetta væri draumadjobbið. Byrjaði létt í kvöld og fékk að fylgjast með hvernig þetta virkar. Var á leik Stjörnunnar og Fram, skráði niður tölfræði og aðstoðaði þann sem sá um að skrifa greinina og taka viðtölin. Svo verður manni væntanlega hent í djúpu laugina fljótlega sem er spennandi.

Spurning hvort ég þurfi að passa mig hér á blogginu varðandi skrif eins og í færslunni hér á undan. Það skal tekið fram að mér finnst margir stuðningsmenn KR gæðaskinn en lýsing mín hér í færslunni og kommentinu sem þar fylgir á samt við um suma þeirra, og jafnvel meira en gott getur talist 

Of cool til að fagna

Auðvitað er það fyrir neðan virðingu KR-inga að fagna þegar þeir bjarga sér frá falli.

Ég held það lýsi ágætlega hrokanum, sem fylgir sumum stuðningsmönnum þessa félags, að 2-3 dögum eftir lokaumferðina voru þeir farnir að ræða á spjallsíðu sinni hversu einfalt það yrði fyrir KR að verða tvöfaldur meistari á næsta ári...

Hvað er að hjá KR?

Virðast sterkir

Real menn virðast sterkir og verða væntanlega í baráttunni um titil fram í síðasta leik. Urðu meistarar í fyrra, eitthvað sem kom mörgum á óvart því þeir virkuðu engan veginn sannfærandi og komu eiginlega bakdyrameginn að bikarnum. Í sumar var svo gerð hreingerning. Nýr þjálfari og margir nýjir leikmenn sem virka sterkir og einnig hefur þjálfarinn komið með yfirlýsingar um að sóknarbolti verði í hávegum hafður.

Vonandi verður þetta bara alvöru barátta hjá risunum tveimur, Real Madrid og svo mínum mönnum í Barcelona.

Ramos skaut Real Madrid á toppinn

Ókeypis skólaganga

Fólk sem greiðir tekjuskatt til sveitarfélagsins er í leiðinni að borga hluta af þessari milljón sem kostar fyrir sveitarfélögin að mennta barn yfir árið. Er sanngjarnt að sumir borgi ekkert fyrir skólagöngu barnsins síns ?

Þeir sem borga einungis fjármagnstekjuskatt, en ekki tekjuskatt, þeir greiða ekkert í útsvar til sveitarfélagsins. Því eru þeir ekki að borga neinn hluta af þessari milljón og börn þeirra fá því ókeypis skólagöngu. Oft er það þannig að þeir sem borga einungis fjármagnstekjuskatt, eru þeir sem hafa það gott peningalega séð.

Það er eitthvað bogið við það að hópur sem borgar ekkert til samfélagsins (a.m.k. í formi tekjuskatts) fái þjónustu frá samfélaginu frítt.

Sorry Hjördís - stal þessari umræðu aðeins frá þér

Grunnskólanemendur kosta milljón á ári