Íslandsmeistarar

Strákarnir mínir bættu enn einni rósinni í hnappagatið um helgina þegar þeir urðu Íslandsmeistarar í innanhússknattspyrnu. Sigurinn var öruggur og verðskuldaður og ekki beint leiðinlegt að þjálfa þessa snillinga

Vonandi að okkur gangi jafn vel þegar við höldum til Akureyrar á Goðamót Þórs nú í lok mánaðarins. Þá fara 80 strákar og nokkuð ljóst að það verður sannkölluð vinnuhelgi !

Undarlegt

Undarlegt hvað maður á auðvelt með að detta inn í ótrúlegustu hluti. Núna er ég t.d. á Facebook á hverjum degi og er í því hægri vinstri að kaupa og selja vini inni sem er hluti af ákveðnum leik þarna. Nú t.d. er ég búinn að kaupa 5 vini, eða "pets", eins og þeir eru kallaðir þarna inni.

Nú á ég bara eftir að komast að því hvernig ég get aflað mér peninga til að kaupa mér almennilega vini. Anyone ?

Uppgötvanir

Fyndið hvernig maður hugsar stundum. Muse hefur verið vinsæl hljómsveit í nokkur ár, ekki síst hér á landi. Samt hef ég einhvern veginn aldrei hlustað neitt mikið á þá, bara svona eitt og eitt lag og fílað þau en samt aldrei lagt mig eitthvað sérstaklega fram til að nálgast meiri tónlist með þeim. Svo núna er ég farinn að hlusta meira á þá og þeir eru auðvitað bara snilldarband.

En fólk vissi það svosem alveg, bara ekki ég !

"Þykir leiðinlegt að ég hafi lent í þessu máli"

Þegar Vilhjálmur sagði þessi orð "mér þykir leiðinlegt að ég hafi lent í þessu máli", á fundinum í dag þá slökkti ég á tölvunni því mér var hreinlega nóg boðið. Það er auðvitað algjör fjarstæða að halda því fram að hann hafi á einhvern hátt lent í þessu máli. Hann hefur grafið sína eigin gröf í þessu máli og vandamál hans eru algjörlega honum sjálfum að kenna.

Eins það að hann haldi virkilega að hann hafi axlað ábyrgð í málinu með því að leggja sig fram við að koma öllu er varðar máliið upp á borðið, þá segir það kannski einna mest um hvernig hann lítur á málið. Hann heldur greinilega að hann hafi ekkert alvarlegt gert af sér !

Vilhjálmur: Hef axlað ábyrgð

Fyrsta fréttin

Hér getið þið séð fyrstu skrif mín í Fréttablaðið. Birtist í blaðinu í morgun og svo á visir.is

Hvíla frekar

Ég myndi nú hvíla kappann um helgina til að ná honum örugglega heilum á móti Inter. Ekki veitir af á móti einu sterkasta liði Evrópu um þessar mundir.

Vonast eftir Torres um helgina

Hanna Birna ?

Birtist frétt í gær eða í morgun á www.visir.is um að Hanna Birna Kristjánsdóttir, borgarfulltrúi Sjálfstæðismanna og forseti borgarstjórnar, þætti líkleg til að komast í forystusveit Sjálfstæðisflokksins á næstu misserum. Þetta var frétt sem skrifuð var samkvæmt pælingum Morgunblaðsins en það að Mogginn skuli skrifa eitthvað í þessum dúr hlýtur að vera hrós fyrir Hönnu Birnu, því Morgunblaðið er jú og hefur verið í langan tíma ansi hallt undir íhaldið, vægast sagt.

Þar sem ég er nú ekki Sjálfstæðismaður þá veit ég ekki alveg hvað þeim finnst um þessa konu sem hefur klifið metorðastiga flokksins nokkuð hratt og var til að mynda sigurvegari síðasta prófkjörs í borginni, ásamt Vilhjálmi, þar sem hún endaði í 2.sæti á undan t.d. Gísla Marteini sem sóttist eftir 1.sætinu.

Er það í alvörunni eitthvað sem hinn almenni Sjálfstæðismaður vill, að hún komist hærra innan Sjálfstæðisflokksins en hún hefur nú þegar ?

Clinton og Obama sterkt teymi

Þó ég hallist frekar að sigri Clinton í þessari baráttu þá er ljóst að Barack Obama hefur komið sterkur inn. Hann var ekki eins stórt nafn þegar baráttan hófst en stendur nú jafnfætis fyrrum forsetafrúnni. Það er ljóst að þau myndu skapa sterkt teymi ef þau byðu sig fram saman í haust, þ.e. sá aðili sem tapar baráttunni núna yrði varaforsetaefni hins. Þá held ég að Demókratar væru í stakk búnir til að hirða Hvíta húsið af Repúblikönum.

John McCain virðist ætla að standa uppi sem sigurvegari þar og ljóst að þar fer sterkur frambjóðandi líka. Minna hefur hins vegar farið fyrir baráttu þeirra og því er maður minna inni í þeim málum. Er ekki hins vegar ágætt að fá forseta frá Demókrötum núna þar sem Repúblikanar hafa verið við völd núna í 8 ár, undir forsæti hins umdeilda Bush ?

Spennandi forkosningar

Sálin 20 ára og Giants meistarar

Keypti mér miða í Höllina á 20 ára afmælistónleika Sálarinnar þann 14.mars. Verður örugglega gaman og öllu á víst að tjalda til að gera þetta sem flottast. Tónleikarnir hefjast ekki fyrr en klukkan 22:00 og það er 18 ára aldurstakmark þannig að það má örugglega frekar kalla þetta ball en tónleika. Tónleikar er samt svona meira fágað.

Annars er vetrarfrí hjá mér og var það vel nýtt í morgun, þar sem ég svaf gjörsamlega frá mér allt vit - eða svona næstum því. Enda horfði ég á Superbowl fram eftir nóttu þannig að mér veitti svo sem ekkert af því að fá að sofa út. Superbowl leikurinn var hin besta skemmtun og spennandi fram á síðustu mínútu. Þó svo að mínir menn hafi nú reyndar tapað þá er alltaf gaman að því þegar litla liðið vinnur. Tilþrifin voru mögnuð í leiknum og mér finnst skrýtið að þessi íþrótt hafi ekki náð meiri vinsældum hér á landi en raun ber vitni.

Heppnir

United voru heppnir í dag. Sá nú reyndar ekki mikið af leiknum en það er auðvitað alltaf heppni að ná að jafna á 94.mínútu. Svo gat ég nú ekki séð betur en Nani hefði átt að fjúka útaf með rautt fyrir suddalega tæklingu á Chimbonda. Það hefði nú klárlega breytt leiknum og gert United erfiðara um vik að jafna.

Mínir menn voru ekkert sérlega flottir í dag þrátt fyrir 3-0 sigur. Enda held ég að ef þeir hefðu ekki unnið þennan leik þá hefði farið að hita verulega undir Rafael Benitez þjálfara. En þetta gefur liðinu vonandi smá sjálfstraust því ekki veitir af fyrir baráttu næstu leikja. Sérstaklega í 16-liða úrslitum Meistaradeildarinnar þegar þeir mæta Inter. En Inter hefur örugga forsystu í ítölsku deildinni sem er nú talin ein af þeim sterkari í þessu bransa.

Tevez kom United til bjargar