Ef einhvern tíman, þá er það núna...

Ef ég hef einhvern tíman verið nálægt því að vera hlynntur dauðarefsingu þá er það í þessu tilfelli. Þvílíkan viðbjóð hef ég sjaldan heyrt um. Þetta er náttúrulega afar brengluð hegðun...

Handtekinn fyrir að nauðga þriggja ára stúlku

Man bara ekki neitt...

Gleymska Villa er með ólíkindum. Hann vill líka eflaust gleyma Kastljós þætti kvöldsins sem fyrst því ekki kom hann vel út þar kallinn. Ég held að ef hann hefur hagsmuni flokksins fyrir brjósti þá ætti hann að segja af sér - það hlýtur einfaldlega að vera krafa Sjálfstæðismanna í borginni. Slíkt er klúður mannsins í þessu máli...

Minnist þess ekki að hafa séð minnisblaðið

Biturleikinn í hámarki

Já biturleiki Sjálfstæðismanna yfir stöðu mála í borgarstjórn er í hámarki - m.a.s. á þessari lítilfjörlegu bloggsíðu þar sem kommentin fljúga hægri vinstri við síðustu tvær færslur !

Endilega takið þátt í umræðunni

Mikið til í þessu

Held bara svei mér þá að Svandís hitti þarna naglann á höfuðið. Þeir geta bara engum nema sjálfum sér um kennt að nú eru þeir í minnihluta.

Jæja, farinn í bústað um helgina ! Adios amigos

„Reynsluleysi sjálfstæðismanna réði því hvernig fór"

Ánægður, en...

Ég er sáttur með þetta, nú komast mínir menn að og Sjálfstæðisflokkurinn farinn frá. Ég verð nú samt að segja eins og er að miðað við hvernig Björn Ingi hefur hagað sér í samstarfinu með Sjálfstæðisflokknum er nokkuð ljóst að það verður ekkert auðvelt að vinna með honum.

Það er nú honum ekki til eftirbreytni að tilkynna veikindi á fund hjá meirihlutanum og senda svo tilkynningu á fundinn að samstarfinu sé slitið og að hann sé búinn að mynda nýjan meirihluta. Væri miklu trúverðugra að koma bara hreint fram. En ég vona að þetta eigi eftir að ganga. R-listinn breytti borginni til hins betra á sínum tíma og nú má segja að flokkarnir sem mynduðu hann séu komnir aftur til valda - ásamt reyndar F-listanum sem hefur lengi sóst eftir að komast í meirihluta í borgarstjórn. Nú er tími fyrir Margréti Sverris til að sýna sig og sanna.

Nýr meirihluti myndaður í borgarstjórn

Sannir sigurvegarar

Sá myndbrot frá þessum keppendum í gær, en Logi Bergmann er staddur í Kína og var að taka viðtal við þá í gær. Ég þekki einn þeirra, algjöran snilling sem heitir Jóhann Fannar og hann gerði sér lítið fyrir og vann til tvennra gullverðlauna í gær ! Frábært hjá honum og óska ég honum innilega til hamingju með það

Keppendur hlaðnir verðlaunapeningum

Við erum slöpp

Ég hef komist að því að við Íslendingar erum lélegur þrýstihópur og lélegir neytendur. Við létum Olíufélögin komast upp með þeirra skandal án þess að þeir gerðu nokkuð fyrir okkur í staðinn. Við látum tryggingafélögin og bankana taka okkur í nefið hvað ýmis mál varðar án þess að múkk heyrist.

Nýjasta dæmið er auðvitað borgarstjóri. Ef þessi maður væri borgarstjóri í einhverri annarri borg í heiminum þá væri löngu búið að neyða hann til að segja af sér. Það er ekkert flóknara en svo. En á Íslandi þá virðist sem fólki sé sama, því hann situr sem fastast.

Hver er til í að mótmæla með mér ?

Crazy Svíar

Kíki alltaf reglulega á sænsku vefmiðlana eftir skiptinemaveru mína þar. Sænska Aftonbladet er í uppáhaldi og þeir eyða oft ótrúlegu plássi í blaðinu sínu í að fjalla um sama málið frá öllum mögulegum hliðum.

Þegar ég var úti var Zlatan Ibrahimovich knattspyrnumaður í svakalegu uppáhaldi hjá þeim og um hverja einustu helgi var hann á forsíðu íþróttablaðsins, það bara var þannig. Ef hann var meiddur þá voru þeir með fréttir um hvernig batinn gengi og það ekki bara í smá klausu, nei nei það var allavega á tveimur blaðsíðum.

Og núna eru Svíarnir ekki sáttir. Zlatan þeirra var ekki tilnefndur sem einn af 30 bestu leikmönnum hjá FIFA, sem ég er reyndar sammála þeim um að sé hneisa. Drengurinn hefur spilað eins og engill á tímabilinu og gerði það líka í fyrra þegar hann varð meistari með Inter. Á sama tíma eru leikmenn eins og Philip Lahm, Juninho og Rafael Marquez tilnefndir. Spes...

En Aftonbladet er alveg að missa sig og leita álits hjá hinum og þessum um hvort þetta sé nú rétt val og undantekningalaust er fólk sammála blaðinu - Zlatan er bestur ! Hvað annað ?

Þrjátíu koma til greina sem knattspyrnumenn ársins hjá FIFA

Í besta falli vandræðalegt

Það er náttúrulega bara hneyksli að maðurinn skuli reyna að ljúga þessu. Það þarf enginn að segja manni það að hann hafi ekki séð hvaða menn voru á þessum lista. Hneyksli, í besta falli vandræðalegt hjá honum. Um leið og hann reynir að ljúga er hann að segja að hann lesi ekki gögnin sem eru lögð fyrir á fundum sem hann sækir. Hreint með ólíkindum.

Fyrir utan allt sem á undan er gengið þá er bara ljóst að manninum er ekki stætt lengur. Hann á að segja af sér á stundinni - ekki vera að dandalast með Yoko í Viðey !

Vilhjálmur segist ekki hafa séð lista yfir kaupréttarhafa

Góður

Kristján Már Unnarsson átti asskoti góð ummæli í beinni útsendingu á Stöð 2 nú rétt áðan. Þar var hann að kynna frétt um friðarsúluna góðu sem tendra á í kvöld og byrjaði fréttina á að segja "Á íslensku heitur hún Imagine peace"

Vissi ekki að það væri íslenska, og er ég þó íslenskukennari...